На бреговите на полуостровот Нормандија излегле на виделина траги од стапалки направени од неандерталците пред околу 80 илјади години, а она што ги збунува археолозите е нивната големина.
Новото откритие фрла сенка на претходните заклучоци за она што го знаеме за овие праисториски луѓе кои се роднини на модерниот човек.
Засилената ерозија поради честиот ветер и плимата во Нормандија изнесе на виделина 257 траги од стапалки стари илјадници години. Според проценките на археолозите, околу 13 различни луѓе од кои 90 отсто деца ги оставиле своите ножни отпечатоци во калта која потоа благодарение на нанесената песок ги сочувала до денес.
„Поради обликот на трагите, археолозите се сигурни дека стапалките се направени од неандерталците кои се разликуваат од модерните луѓе. Во тоа доба, тие биле единствен вид на луѓе во Европа. Модерниот човек се појавил 35 илјади години по периодот на кој му припаѓаат стапалките“, вели Жереми Диво, еден од истражувачите.
Она што е необично е големината на стапалките оставени од еден возрасен неандерталец кои индицираат дека бил висок околу 1,73 сантиметри, што е повеќе од досегашните заклучоци кои нивната височина ја сместија од 164 до 168 за машките неандерталци.
„Можеби едноставно токму тој неандерталец бил необично висок. Или можеби претходните истражувања околу просечната висина на овој вид на луѓе се погрешни“, збунет е и Диво.