Италијанската полиција заплени рекордни 14 тони амфетамин наменет за европскиот пазар, чијашто улична вредност се проценува на една милијарда американски долари, а се претпоставува дека дрогата е произведена во Сирија од група поврзана со т.н. Исламска држава поради финансирање на нејзините екстремистички активности.
Полициските власти соопштија дека околу 85 милиони таблети амфетамин биле пронајдени во три бродски контејнери во пристаништето Салерно во јужна Италија, што е најголема заплена на оваа дрога досега во светот.
Полковникот на царинската полиција Доменико Наполитано за државното радио изјави дека истражителите веруваат дека дрогата била произведена од таканаречената ИД за финансирање на нејзините милитантни активности.
Тие претпоставуваат дека производството на амфетамин во Европа е попречено од пандемијата на коронавирус и дека дилерите на дрога, најверојатно, се обратиле до производителите во Сирија.
Полицијата соопшти дека во моментов се обидуваат да утврдат дали криминалниот клан Камора од Неапол нарачал голема пратка амфетамини за меѓународна дистрибуција, со оглед дека многу помала количина на таа дрога била запленета две недели претходно во пристаништето Салерно.
