Свет

Во Јапонија прв смртен случај од новиот корона вирус

13. февруари 2020 - 15:34 | МИА

Токио, 13 февруари 2020 (МИА) – Јапонија денеска го пријави првиот смртен случај предизвикан од корона вирусот.

– Поврзаноста помеѓу новиот корона вирус и смртта на 80-годишната жена засега не е утврдена. Се работи за прв смртен случај позитивен на вирусот, изјави јапонскиот министер за здравство Кацунобу Като.

Тој додаде дека позитивниот тест на новиот корона вирус е потврден по смртта на пациентката. Жената живеела во регионот Кабагава, јужно од Токио. Таа имала симптоми на болеста од 22 јануари, а била хоспитализирана на 1 февруари.

Во Јапонија се регистрирани 28 пациенти заразени со новиот вирус, од кои најмалку девет лица се вратиле од кинеската провинција Хубеи.

Претходно, јапонското Министерство за здравство соопшти дека уште 44 лица на крузерот „Дајмонд принцес“, закотвен во близина на градот Јокохама, се заразени од новиот корона вирус наречен COVID-19. Со тоа бројот на заболени на бродот, на кој во карантин се наоѓаат повеќе од 3.500 патници и членови на екипажот, се зголеми на 218, од 713 лица колку што се досега тестирани.

Јапонските власти соопштија дека ќе им дозволат на некои повозрасни патници, кои биле негативни на тестот за корона вирус, да го напуштат бродот пред истекот на карантинот, 19 февруари. Министерот за здравство Кацунобу Като истакна дека тие ќе заминат од бродот уште утре, а останатото време за карантин ќе го продолжат на копно.

Според јапонските медиуми, околу 80 отсто од патниците се над 60-годишна возраст, 215 се на 80-годишна возраст, а 11 лица имаат по 90 години. 

Коментирај