Најстарите познати гробишта во светот се пронајдени во Јужна Африка, а новооткриените древни гробници се стари најмалку 200.000 години.
Научниците пронашле скелети од видот Хомо наледи, далечен роднина на луѓето. Овие древни луѓе биле ниски, имале долги раце, закривени прсти и мал мозок со големина на портокал. Новооткриените древни гробници се стари најмалку 200.000 години, а претходно се веруваше дека гробниците на Хомо сапиенс стари 100.000 години се најстарите погребни места во историјата на хоминините.
Познатиот палеоантрополог Ли Бергер го водел ископувањето во системот на пештерата Рајзинг Стар, во делот Лулка на човештвото, светско наследство на УНЕСКО во Јужна Африка. Тимот открил неколку фосили од видот Хомо наледи закопани околу 30 метри длабоко во пештерскиот систем Рајзинг Стар на оваа локација.
„Да се биде внатре во пештерите, во светот на видот Хомо наледи, не е само авантура што го менува животот, туку она што го откривме нѐ принудува да размислиме за цела низа претпоставки за хоминините и човечката еволуција“, рече Фуентес, професор по антропологија на Универзитетот Принстон.
Погребувањата во овална форма содржеле остатоци од десетина изумрени видови хоминини, кои веројатно биле закопани во фетална положба. Некои биле идентификувани како возрасни, но имало и деца веројатно помлади од 13 години.
Овој вид хоминиди што се качувал на дрвја биле на „раскрсницата“ меѓу мајмуните и современите луѓе. Првите коски од видот Хомо наледи беа откриени во 2013 година.
Нивниот мозок бил само една третина од оној на современите луѓе и долго време се сметало дека тие не биле способни за сложено емоционално и когнитивно однесување. Сепак, новоидентификуваните примероци го оспоруваат сегашното разбирање на човечката еволуција бидејќи во голема мера се претпоставуваше дека развојот на поголем мозок дозволува извршување на сложени активности како што е закопување на мртвите. Овие наоди сугерираат дека практиките на погребување не биле „ексклузивни“ за хоминините со голем мозок.
И покрај малите мозоци, овие хоминиди од каменото време можеби палеле оган и врежувале геометриски симболи на ѕидовите на пештерите. Овие идентификувани врежани симболи би можеле да бидат стари помеѓу 241.000 и 335.000 години.
