Половните автомобили со турбо дизел мотори на нашиот пазар се доста барани, најмногу поради помалата потрошувачка на гориво од бензинците со иста сила. Од друга страна, потенцијалните потрошувачи стравуваат дека одржувањето на дизелите со голема километража би можело да биде прескапо.
Додека во Европската Унија постарите возила со дизел мотори се на мета на критики поради големото загадување на воздухот, кај нас овие автомобили стануваат лоши само кога ќе дојде време за замена на потрошните делови или кога автомобилите почнуваат да се расипуваат поради големиот број на поминати километри.
Бидејќи на нашиот пазар пристигнуваат половни модели со дизел мотори кои поминале и повеќе од 200.000 километри, се поставува прашањето во каква состојба се тие возила и дали новиот сопственик го очекуваат големи трошоци поради поминатиот век на деловите, што би можело да ја анулира заштедата која ја носи помалата потрошувачка на гориво на таквите автомобили.
Британскиот портал „CarThrottle“ одлучи да испита во каква состојба е Škoda Octavia 1.9 TDI прва генерација со 90 коњски сили, која зад себе има, не 200.000, туку дури 695.000 поминати километри.
Од автомобил кој е стар околу 20 години и кој поминал толкав број на километри не може да се очекува да биде во совршена состојба, но сепак, во зависност од тоа како го одржувал претходниот сопственик, моторот и не мора да биде во потполно лоша состојба.
На крај, се покажало дека оваа Octavia е во сосема солидна состојба, кога ќе се земат сите фактори во предвид.
Овој автомобил и понатаму има оригинален турбо полнач, издувен систем и амортизери.
Моторот бил во одлична состојба, што иако можеби на прв поглед за автомбил кој има поминато речиси 700.000 километри претставува изненадување, сепак тоа доста зависи и од редовното и правилно одржување, односно замената на флуидите во пропишаните рокови и употребата на адекватно моторно масло препорачано од страна на произведувачот.
