Отпечатоци од диносаурус стари 100 милиони години се откриени во југозападна Кина откако биле забележани од посетител во дворот на ресторан во Лешан, во покраината Сечуан.
„Неколку камени јами во ресторанот содржат отпечатоци на два сауроподи – вид диносауруси кои живееле во раниот период креда“, вели Лида Ксинг, палеонтолог и професор на Кинескиот универзитет за геологија.
Нејзиниот тим во саботата го потврди откритието, користејќи 3D скенер.
Сауроподите, познати по долгите вратови и опашки, биле најголемите животни коишто некогаш оделе на Земјата. Тие можеле да пораснат до големина речиси колку трикатна куќа и биле толку тешки што „земјата се тресела под нив“ додека се движеле.
„Сауроподите кои оставиле траги во Сечуан веројатно биле долги околу осум метри“, изјави Ксинг.
Иако многу фосили од диносауруси од периодот јура се откриени во Сечуан, пронајдени се многу малку фосили од периодот креда. Ксинг смета дека второво доба е „златното време на диносаурусите“, а „ова откритие е како парче од сложувалката и сведочи за различноста на диносаурусите.