Норвешката поштенска служба објави реклама каде се зборува за хомосексуална врска помеѓу Дедо Мраз и човек по име Хари и која предизвика низа реакции како во земјата, така и на Стариот континент.
Создадена со цел да ја одбележи 50-годишнината откако Норвешка ја декриминализира хомосексуалноста, рекламата наречена „When Harry Met Santa“ ја отсликува љубовната афера помеѓу норвешки маж и самиот Дедо Мраз. Неколку години Дедо Мраз го посетува Хари, при што двајцата се вљубуваат еден во друг.
Рекламата завршува со страстен бакнеж помеѓу нив, за потоа Posten, норвешката поштенска служба, да ги преземе пратките на Дедо Мраз и да продолжи да ги доставува во текот на ноќта.
ЛГБТ групите и групите за права на хомосексуалците рекламата ја оценија како „силна и трогателна порака за прифаќање“.
Но, рекламата предизвика лавина негативни реакции не само во Норвешка, туку низ цела Европа. Многумина беа згрозени од тоа што е искористен еден детски лик како Дедо Мраз.
„Оставете го Дедо Мраз на мира!“, „Зошто во денешно време сѐ мора да се прави геј?“ и „Сексуализирањето на Дедо Мраз е едноставно погрешно... дали геј или стрејт. Рекламава е морничава и вознемирувачка!“ се некои од коментарите.
Последниве години особено стана масовна злоупотребата на новогодишните и божикните празници за различни побуди, од климатски промени до истополови бракови. Дедо Мраз не е единствен кој се вплеткува во оваа „војна“ бидејќи некои божикни песни станаа забранети откако беа оценети дека во нив има премногу сексуалност. На некои места песната „Baby It’s Cold Outside“ стана забранета поради стихот „ја видов мама како го бакнува Дедо Мраз“.
