Кипар и Израел се главните фаворити за победа на вечерашното финале на овогодинешното издание на Евровизија, додека, според квотите на онлајн обложувалниците, Франција е веднаш зад нив.
Според податоците на сајтот http://Eurovisionworld.com, претставничката на Кипар, Елени Фуреира, има мала предност пред вечерното финале во однос на останатите учесници на Евровизија.
Нумерата „Fuego“, чиј ритам потсетува на стилот на славната Шакира или Бијонсе, во случај на победа носи околу два евра на влог од едно евро.
Првата фаворитка уште пред првото полуфинале во вторникот, израелската пејачка Нета, во обложувалниците е втор фаворит за победник.
Нејзината песна „Toy“ е повик за еманципација на жените, која добро се вклопува во духот на движењето #MeToo, со весела музика и танц.
Францускиот дует „Madam Monsieur“ е трет фаворит за победник, а ако тоа се случи и тие победат на евровизија, оние кои вложиле во нив ќе имаат околу 10 до 15 евра профит на секое вложено евро, во зависност од обложувалницата во која се обложиле.
Нивната песна „Mercy“ зборува за дете родено во мигрантски брод.
Финалето на 63 издание на Евровизија ќе се одржи вечерва во Лисабон.
Ќе се натпреваруваат вкупно 26 финалисти, а победникот ќе биде одлучен после комбинација на гласови на жирито и гледачи од 43 земји учеснички.
