Во пукање во Рим е убиена блиска пријателка на италијанската премиерка Џорџа Мелони.
Три лица се убиени, додека најмалку тројца се ранети во пукање кое се случило во текот на состанок на станари, во едно кафуле во Рим.
Според пишувањето на италијанските медиуми, 57-годишниот напаѓач бил во низа спорови со станарите на соседната зграда и редовниот состанок во кафуле го искористил како идеална можност за одмазда.
„Влезе во кафулето, ја затвори вратата и рече дека сите ќе нè убие. Потоа почна да пука“, вели еден од сведоците на настанот.
Напаѓачот бил совладан пред да пристигне полицијата. Во текот на пукањето, убил три жени меѓу нив и блиска пријателка на италијанската премиерка Џорџа Мелони, која преку објава на Facebook се збогува со неа.
„Николета Голисано беше мајка, искрена пријателка, силна и нежна жена во исто време. Исто така, беше професионалец со необично чувство на одговорност. Тоа чувство за одговорност ја одведе во неделата на местото каде дојде тој човек и ја уби. Николета беше моја пријателка, имаше сопруг Џовани и преубав 10-годишен син Лоренцо“, напиша Мелони.
Премиерката се надева дека осомничениот ќе биде соодветно казнет.
