Работнички со оптимизам влегува во проектот за новата натпреварувачка сезона 2023/2024 во најдобрата македонска фудбалска лига, а раководството на клубот има доверба во шефот на стручниот штаб Милан Илиевски, со кого е постигната согласност за обновување на соработката и за наредниот период.
„Раководството на клубот ја анализираше изминатата сезона и иако нема многу причини за задоволство од конечниот пласман на табелата, сепак, задоволни сме од професионалноста и начинот на работа на шефот на стручниот штаб Милан Илиевски. Со него постигнавме договор за продолжување на соработката и во наредниот период. Откако ја доби довербата, Илиевски ја стабилизираше екипата, оствари позитивни резултати, а истовремено и промовираше голем број млади фудбалери во тимот, кои се стекнаа со неопходното прволигашко искуство и се светла иднина на ФК Работнички“, изјави претседателот на клубот, Драган Поповски.
Тренерот Милан Илиевски, кој е и поранешен деффанзивец на овој клуб, е задоволен што ја продолжува соработката со Работнички и за наредниот период.
„Чест е да се предводи ФК Работнички, но и голема обврска. Благодарност до раководството на клубот за довербата, можам да ветам напорна работа, а уверен сум дека тимот располага со голем потенцијал и ќе се трудиме да го извлечеме најдоброто на секој натпревар за да ги исполниме целите на Работнички“, изјави шефот на стручниот штаб, Милан Илиевски.
Работнички изминатава сезона ја заврши на 8. место, а не постигна успех ниту во Купот.
Илиевски беше дел од шампиопнските генерации на клубот во првите годинио од овој век. Покрај Работнички настапуваше и за Вардар, Милано, Македонија ЃП и Металург.
