Алпин денеска објави дека во 2023 година за нивниот тим ќе вози Оскар Пјастри наместо Фернандо Алонсо, кој вчера изненадувачки ја потврди својата преселба во Астон Мартин. Но, следуваше нов шок за францускиот тим во Формула 1 за неполни 24 часа.
Имено, 21-годишниот Австралиец преку социјалните мрежи објави дека следната година нема да вози за Алпин.
„Алпин Ф1 издаде соопштение без моја согласност во кое вели дека ќе возам за нив следната година. Ова е неточно бидејќи немам потпишано договор со Алпин за 2023 година. Нема да возам за Алпин следната година", напиша талентираниот австралиски возач од италијанско потекло.
Инаку, Пјастри е производ на возачката академија на Алпин, каде пристигна во 2019 година по освојувањето на титулата во Формула Рено Еврокупот.
Австралиецот беше најдобар возач во Формула 3 наредната сезона, за да го освои шампионатот во Формула 2 во 2021 година.
Во францускиот тим Пјастри ја доби улогата на втор возач, покрај Французинот Естебан Окон, кој е во тимот од 2020 година и моментално е на 8. место во пласманот на Светскиот шампионат во Формула 1.
Да потсетиме, утринава предводникот на Алпин, Отмар Шафнауер на прес-конференција потврди дека разделбата со Алонсо е поради тоа што не можеле да се договорат за должината на новиот договор.