Иако епидемијата на COVID-19 во Словенија по два и пол месеци е прогласена за завршена, можноста за втор бран на заразата и понатаму е вистинска опасност, па на граѓаните им се препорачува секогаш и секаде да имаат маска при рака, соопштија денеска владините служби.
Задолжително е носењето маска или покривка на носот и устата во здравствените установи, при посета на домови за стари лица и во јавниот превоз, но носењето маска со себе е новата реалност на која граѓаните треба да се навикнат, рече портпаролот на Владата за корона-кризата Јелко Кацин.
Маска за лице треба да се користи секогаш кога не може да се осигура физичка дистанца од најмалку 1,5 метар. Членовите на обезбедувањето на институции, трговски и угостителски објекти и слично смеат да забранат влез на луѓето кои не носат заштита, а работодавците мора да им обезбедат заштитна опрема на вработените.
Словенечкиот министер за здравство Томаж Гантар предупреди дека времето до можниот втор бран треба да се искористи за зајакнување на потребните капацитети во здравството, врз основа на искуствата од текот на епидемијата.
Кацин рече дека е при крај составувањето на списокот со десетина земји од ЕУ на чии државјани на ќе им се овозможи влез и престој во Словенија без задолжителна самоизолација, карантин или потврда дека не се позитивни на COVID-19.