Паркот наречен House of Steel Robots во близина на Бангкок нуди необично доживување - дружба со џиновските трансформери и хероите од Марвел универзумот.
Се наоѓа во провинцијата Ан Тон, северно од главниот град Бангкок. На посетителите им нуди уникатно искуство, дружба со огромните трансформери, хероите од Марвел универзумот, Кинг Конг и многу други ликови од филмовите и стриповите, сите направени од метал.
„Сѐ започна поради газдата Фаироте Таномуон кој отсекогаш уживаше да изработува модели и роботи“, вели менаџерот Анек Фудфон.
Еден ден Таномуон си дал отказ од работното место, отворил фабрика и ги поканил сите локални талентирани работници со познавања од заварување. Хобито го трансформирал во успешен бизнис со посетители и муштерии од целиот свет.
„Поголемиот дел од нашите модели се изработени од отпадно железо од нашиот регион. Околу 80 проценти, додека останатото се од рециклирани и нови материјали“, вели Фудфон.
Изложените модели можат и да се купат. Најголемиот дел од продажбата пред корона-кризата била за европскиот и азискиот пазар.
