Повеќе од еден век по откривањето на саркофагот, египтолозите одлучија да ја испитаат заборавената мумија наречена Златно момче.
Во 1916 година, на гробишта во Јужен Египет била откриена мумија. Во тоа време била регистрирана и испратена во Каиро каде била сместена во депото на Египетскиот музеј, по што била заборавена. Ќе поминат повеќе од 100 години пред некој да ја забележи и да одлучи да ја подложи на зраците на КТ скенер, врз основа на кои се откриени многу информации скриени во внатрешноста на мумијата и ковчегот.
Египетското Министерство за туризам и антиквитети во соопштение наведува дека мумијата, која го носи името Златно момче, била поставена во два ковчега. Надворешниот имал натпис на старогрчки, поради што се датира во периодот на Птоломеите. Додека внатрешниот ковчег бил направен од дрво. Кога египтолозите подетално ги истражиле сликите од скенерот, откриле 49 амајлии скриени меѓу завоите на починатиот.
Меѓу највпечатливите е една во форма на два прста до необрежаниот пенис на момчето, златен скараб во облик на срце сместен во градите и златен јазик во внатрешноста на устата. Дополнително, откриено е дека починатиот носел и сандали. И, иако неговиот идентитет сѐ уште не е познат, експертите тврдат дека тој припаѓал на повисоките слоеви на древното египетско општество.
Познато е дека Египќаните верувале во моќта на амајлиите. Ги користеле првенствено за да обезбедат заштита и специфични придобивки. И за живите и за мртвите. За време на балсамирањето, биле поставени за да се одржи виталноста на починатиот. Така, јазикот на момчето бил покриен со злато за да може да зборува. Сандалите требало да му овозможат да се движи за да го напушти гробот кој задгробниот живот. А, златниот скараб во форма на срце најверојатно симболично го претставува органот сместен во празнината на торзото.
Заинтересирани за оваа амајлија, научниците дури и одлучиле да направат нејзина реплика со помош на 3D печатач.
„Беше навистина неверојатно чувство. Особено откако беше испечатена во 3D и јас го зедов в раце“, објасни авторот на студијата и радиолог, Сахар Салим од Медицинскиот факултет при Универзитетот во Каиро. „На задната страна беа изгравирани знаци кои претставуваат натписи и магии напишани од свештениците за да го заштитат момчето за време на неговото патување“.
Резултатите се објавени во списанието Frontiers of Medicine.
