Водечки модни трендови за есен 2019

Додека дизајнерите ги претставуваат нивните колекции за сезоната пролет/лето 2020, она што се случува на улиците за време на модните недели е најдобар индикатор за тоа што ќе се носи во сезоната на повидок.

Во тек е Модната недела во Њујорк (6-14 септември), а уличната мода одлично илустрираше кои парчиња од модните писти од минатата сезона „фатија корен“ кај модните икони и најдобро се влопија во стилот на трендсетерите.

Полека попушта манијата по 90-тите, со исклучок на панталоните и фармерки со висок струк и впечатливи, масивни ремени и комбинациите на бели маички под летни фустани на тенки прерамки.

За оваа есен се издвојуваат неколку трендови: микс на животински принтови (препорачливо во боите на есента), опуштени и недефинирани кроеви (удобноста пред сѐ!), силуети на фустани од 70-тите, груби модели на патики во комбинација со сѐ и ако веќе сакате да привлечете внимание со боја, тоа нека биде кармин или рубин црвена или електрично портокалова.

АЛЕКСАНДРА СПАСЕСКА