Пред нас е продолжен празничен викенд, а во ек се летните одмори.
Голем дел од нашите граѓани ја избираат Грција како летна дестинација за одмор, па најдобро е да бидете информирани и подготвени пред да се спакувате и да тргнете на пат.
Колку и каква храна и пијалаци, како и тутун и цигари може да внесете во Грција како турист? Одговорите на овие прашања, како и други информации во врска со престојот во Грција, прочитајте понатаму во текстот.
ХРАНА
Грција е земја-членка на Европската Унија, а според законите и регулативите на ЕУ, при влез во некоја од земјите-членки забрането е да се внесуваат месо и млечни производи.
При влез во Грција забрането е внесување на месо од секој вид, вклучувајќи виршли, шунка, сувомеснати производи, како и млеко и млечни производи (сирење, јогурт,павлака).
Во земјата исто така не смее да се внесуваат готвени јадења и лесно расипливи намирници.
Дозволено е да внесете овошје и зеленчук, со исклучок на компири. Може да имате два килограми млеко во прав за бебе, храна за посебни потреби и до два килограми храна за домашни миленици.
Дозволено е и внесување на ориз, кекси, макарони, чоколадо, сокови и вода, но вредноста на сите овие намирници не смее да е повисока од 300 евра по патник.
ЦИГАРИ, ТУТУН, АЛКОХОЛ, ЛЕКОВИ И ДРОГИ
Тутунски производи:
– 800 цигари;
– 400 цигарилоси (макс. 3g една);
– 200 пури;
– 1кг тутун;
Алкохолни пијалоци:
– 10 литри алкохол над 22%;
– 20 литри алкохол под 22%;
– 90 литри вино (но не повеќе од 60 литри минерална вода);
– 110 литри пиво.
Овие количини може да бидат одземени од царината, доколку оценат дека ќе се користат за комерцијална употреба.
Употребата и поседување на било какви дроги, вклучувајќи и класа Ц дроги, може да резултира со долга затворска казна и висока парична казна.
Други производи
– Лекови за лична употреба
– Лични работи за некомерцијална употреба со вредност во висина од 430 евра при патување со авион или брод.
– Лични работи за некомерцијална употреба со вредност во висина од 300 евра при патување по копно.
– Лични работи за некомерцијална употреба со вредност во висина од 150 евра за патници под 15 години.
ДРУГИ ВАЖНИ ИНФОРМАЦИИ
- Зборувањето на мобилен телефон додека управувате возило во Грција е забрането. Полицијата може да ја провери листата на повици при истражување на сообраќајни несреќи.
- Возењето под дејство на алкохол е казниво со закон. Секоја општина има свои рестрикции и висина на казни, па тие се движат од 250 до 2.000 евра, одземање на возачката дозвола па дури и казна затвор. Дозволеното ниво на алкохол во крвта е значително помало во споредба со кај нас, па дозволено е максимум 0,25 промили. За нови возачи (помалку од 2 години искуство), возачи на мотор/мопед и професионални возачи (возачи на такси, автобуси), дозволено е 0,10 промили алкохол во крвта. Полицијата може да ве застане во било кој момент и да изврши контрола.
- Според новиот закон што го воведе Грција, пушењето е забрането во јавни простории и е многу сличен на нашиот во Македонија. Глобите се движат до 500 евра доколку ве фатат како пушите во затворен објект – ресторан, кафуле и слично.
Телефонски броеви за итни случаи
100 за Полиција
161 за Брза помош
199 за Пожарна
108 за Крајбрежна стража
Дел од информациите се преземени од порталот pravdiko.mk.