Почина водителот Драган Вучиќ, откако изминативе денови бил во тешка здравствена состојба.
Според новинската агенција Макфакс, Вучиќ бил хоспитализиран на Клиниката за инфективни болести во Скопје, откако му бил дијагностициран коронавирусот. Вучиќ поради состојбата бил ставен на респираторна поддршка и починал синоќа од компликации од COVID-19 .
Вучиќ е роден во 1955 година, а работеше како композитор, пејач и водител. Познат е во јавноста по бројните емисии и квизови како „Вашите пет минути“, „Среќни луѓе“, „Возење со Вучиќ“ и други. Последен негов проект е „Гурмански приказни“, емисија која се снимаше низ повеќе земји на Балканот со познати пејачи, актери, артисти, потсетуваат од Макфакс.
Порталот SDK.MK ја објави веста за смртта на Вучиќ, наведувајќи извори блиски на семејството. Во објавата потсетуваат дека тој е автор на популарни поп песни како „Свирете ја ‘Зајди, зајди’“, „Ангели ме носат“, „Заминува, никому ноќва не кажува“, „Кажи ѕвездо“, а беше автор и на евровизиската песна „Make My Day“, на неговиот син Мартин Вучиќ во 2005.
Министерот за здравство Венко Филипче преку социјалните мрежија потврди веста за смртта на Вучиќ.
„Утрово на Инфективната клиника од коронавирусот почина нашиот познат музичар, композитор и ТВ-водител Драган Вучиќ. Тој беше хоспитализиран пред осум дена откако состојбата му се влошила и од тогаш е лекуван на оделението за интензивна нега. И покрај сите напори на лекарите и целиот стручен тим, Вучиќ со многу тежок наод на белите дробови, за жал, му подлегнал на вирусот. Упатувам искрено сочуство до семејството и блиските.“
