По вториот пораз во квалификациите нашиот капитенот даде оценка на она што го одигравме на двата натпревара.
„Една игра со Естонија, сосема друга, подобра, против Русија. За жал, крајниот ефект, поразителен“, почнува Војдан. Македонија во четвртокот разочара пред домашната публика губејќи од Естонија, додека синоќа во една израмнета игра сепак загуби од далеку посилната Русија.
„Ова е играта која треба да ја негуваме во иднина, без разлика што сега загубивме. Треба да бидеме борбени во сите 40 минути и треба да веруваме во сопствените сили, не треба да гледаме на противниците со респект. Се боревме, навистина игравме добро, мислам дека ни недостасуваше малку енергија па и малку среќа во финишот“, вели Стојановски.
„Во Перм видовме дека можеме многу подобро. Видовме дека имаме потенцијал. Штета, навистина голема штета што не го искористивме домашниот терен, имавме и полна сала. Ги имавме сите услови за победнички старт. Затоа можам да кажам дека искрено, сега поразот од Естонија боли уште повеќе“, сумира нашиот најдобар поединец на двата натпревара.
Македонија на стартот запиша два пораза, но има уште четири натпревари до крајот и воедно надеж која, нормално, последна умира.
„Факт е дека до ноември има долг период пред нас. Она што јас искрено си посакувам е да нè служи здравје сите. За наредните средби да бидеме комплетни. Тогаш ќе знаеме што нè чека. Знам дека ќе одиграме многу подобро, дека ќе стигнеме до победа и со самото тоа да се вратиме во трката за настап на Европското првенство следната година“, порачува Војдан.
