Секоја година Volkswagen подготвува концепт за фестивалот Wörthersee во Австрија, а со оглед на ситуацијата предизвикана од пандемијата на коронавирус, оваа година автомобилот беше претставен во фабриката на германската компанија.
Станува збор за концепт Volkswagen Golf GTE Skylight со хибриден погон, кој е сличен на минатогодишниот концепт GTE HyRace.
Како што може да се очекува од концептот, Skylight се разликува од серискиот модел Golf GTE на кој се базира, во неколку детали. Пред сè, има специјално „руво“ со сина графика од Lapiz и Catalina на белото тело, како и 20-инчни бандажи. Рачките на вратите се осветлени, а задните светла имаат бела LED-графика на црна позадина. Поголемиот заден спојлер и браници се позајмени од Golf R, а концептот го красат издувните цевки од не'рѓосувачки челик, кои се направени со 3Д печатач.
Внатре има холограм со ознака GTE над централниот екран на допир, кој реагира на брзина или забрзување. Синиот тапацир на спортските седишта одговара на сините детали на контролната табла, воланот и панелите на вратите. Изборот на боја се чини логичен со оглед на тоа што ознаката GTE е поврзана со сината, GTI со црвената и GTD со црната.
Дел од автомобилот е импресивниот звучен систем скриен во багажникот, а неговата вкупна моќност е 3.110W. Тоа е повеќе од доволно за организирање забава на отворено. Во багажникот има електричен скејтборд.
Кога станува збор за погонот, нема промени. Сè уште постои комбинација од 1.4-литарски TSI и електромотор, кој испорачува вкупно 242 КС и 400 Nm вртежен момент. Силата се пренесува на предните тркала преку 6-брзински менувач DSG со употреба на електронски диференцијал XDS. Батеријата од 13kWh обезбедува електричен опсег од 60 км, а адаптивната суспензија DCC овозможува удобно или спортско возење, по желба на возачот.
Во проектот беа ангажирани 16 вработени, а според традицијата, тројца беа дел од минатогодишниот проект.
Оние кои сакаат да го видат концептот во живо, можат да го сторат тоа во фабриката Autostadt на Volkswagen во Волфсбург.