Германскиот производител на автомобили Volkswagen најави дека ќе прави евтини електрични возила по почетна цена од околу 20.000 евра.
Светската премиера на новиот автомобил е планирана за 2027 година, објави Reuters.
Извршниот директор на Volkswagen, Оливер Блуме, нагласи дека компанијата треба да ги комбинира „јасната посветеност на Европа како индустриска локација, европската индустриска политика и на крајот да дејствува во интерес на европските клиенти“.
Шефот за маркетинг на германскиот производител, Томас Шефер, изјави дека и покрај ниската цена, планираниот модел од почетно ниво ќе постави стандарди во однос на технологијата, дизајнот и квалитетот.
Агенцијата наведува дека VW се одлучил на ваков потег со цел поуспешно да се натпреварува на пазарот, пред сè со силните кинески ривали, од кои некои имаат предност за 30 отсто помали трошоци во однос на западните конкуренти.
Компанијата со седиште во Волфсбург минатата недела соопшти дека европската индустрија има меѓу две и три години да се подготви за конкурентни закани и предупреди дека опстанокот на автомобилскиот сектор веќе е загрозен.
