Авто новости

Volkswagen Passat стигна до 30 милиони произведени примероци

5. април 2019 - 12:02 | К.З.

Германскиот автомобилски гигант Volkswagen има многу причини за славење годинава, а следна во низата е прославата за моделот Passat, кој заклучно со вчерашниот ден е произведен во 30 милиони примероци и е убедливо најпродаваниот автомобил од сегментот D досега.

Првиот Passat се појави на пазарот пред 46 години, а оттогаш до денес Volkswagen произведе повеќе од 30 милиони примероци од овој автомобил.

Ова возило од средна категорија во моментов се произведува во десет фабрики на три континенти и се испорачува во повеќе од 100 земји, меѓу кои и Северна Македонија.

Европските купувачи ќе можат да го купат последното, темелно редизајнирано издание на бестселерот на Volkswagen веќе од почетокот на мај. Passat е вториот најпродаван модел на германската компанија, бидејќи на првото место неприкосновено стои Golf, кој во изминатите 45 години се продаде во преку 35 милиони примероци.

Производството на Passat започна на 14 мај 1973 година во Волфсбург. Тогаш компанијата го креираше Passat како замена за моделот 1600, кој имаше мотор со воздушно ладење и погон на задните тркала. Честа да биде 30-милионитиот Passat му припадна на plug-in хибридниот модел GTE Variant, кој располага со 218 коњски сили.

Коментирај