Неколку часа откако Елон Маск рече дека „експертите“ нема потреба да се грижат за финансиската ситуација на неговата компанија, Volkswagen нарача електрични батерии кои вкупно вредеа колку што вреди и целата компанија Tesla.
Германскиот автомобилски гигант Volkswagen направи нарачка на електрични батерии во вредност од 48 милијарди долари, сума која е многу блиску до пазарната вредност на Tesla Motors, која изнесува 50 милијарди долари.
Елон Маск смета дека Tesla Motors може да биде многу профитабилна компанија и во иднина нејзината вредност би можела да достигне и до 700 милијарди долари. Но, тоа нема никаква вредност кога компанијата (барем во моментов) не прави профит за да биде самоодржлива.
Сепак, гореспоменатата зделка ги потврдува информациите дека Volkswagen го има многу сериозно сфатено пазарот на електрични автомобили. Според плановите на германската компанија, до 2025 година таа би требало да продава околу 3 милиони електрични автомобили секоја година.
Иако Маск се смета за еден од најголемите пронаоѓачи и најуспешни бизнис луѓе во светот, сепак тој не може рачно да ги контролира бројките кои ја опкружуваат неговата компанија. Големината на Volkswagen изгледа недостижна, бидејќи германскиот гигант произведува ист број на автомобили за четири дена колку што Tesla произведува за една година.
Вредноста на Volkswagen постојано расте, и покрај скандалот со измамата кај дизел автомобилите.