Вчера на Волстрит индексот S&P 500 втор ден по ред благо падна бидејќи инвеститорите не се склони кон поризични инвестиции пред говорот на претседателот на американската централна банка Џером Пауел за економската состојба.
Dow Jones зајакна 0,01 отсто, на 33.852 поени, додека S&P 500 падна за 0,16 отсто, на 3.957 поени, а индексот Nasdaq 0,59 отсто, на 10.983 поени. Инвеститорите се склони кон ризик затоа што денеска претседателот на ФЕД Пауел ќе зборува во Институтот Брукингс за состојбата на економијата, што може да им даде на инвеститорите нови насоки за инфлацијата и каматните стапки.
„Сите се нервозни“
„Никој не сака да купува пред утрешниот говор на Пауел. Сите се нервозни и се прашуваат што ќе каже“, рече Рон Саба, портфолио менаџер во Horizon Investments. Бидејќи инфлациските притисоци во САД благо се намалуваат во последниве месеци, инвеститорите се надеваат дека ФЕД ќе ги зголеми каматните стапки за „само“ 0,50 процентни поени во декември, по серијата зголемувања од 0,75 поени.
Инвеститорите се претпазливи и од извештајот кој покажа дека довербата на потрошувачите во САД дополнително ослабе во ноември поради растот на трошоците за живот, што не е многу позитивна најава за претстојната празнична сезона.
Apple меѓу најголемите губитници
Покрај тоа, инвеститорите се загрижени за протестите во Кина поради строгите рестриктивни мерки за борба против COVID-19, а бидејќи бројот на заразени продолжува да расте, се очекува дополнително забавување на и онака бавниот раст на втората по големина економија во светот.
Меѓу најголемите губитници вчера, четврти ден по ред, беше акцијата на Apple, што е последица на протестите во кинеската фабрика во која се произведуваат најмногу iPhone-и. Инвеститорите се плашат дека празничната продажба на овие паметни телефони на Apple ќе пропадне поради застој на производството.
Цените на акциите на технолошките гиганти Amazon, Nvidia и Tesla значително паднаа, за повеќе од 1 отсто, што најмногу ги потисна индексите Nasdaq и S&P 500.
Внимателно вчера се тргуваше и на европските берзи. Лондонскиот FTSE индекс зајакна за 0,51 отсто, на 7.512 поени, а париски CAC се зголеми за 0,06 отсто, на 6.668 поени. Франкфуртскиот DAX се лизна, пак, за 0,19 отсто, на 14.355 поени.
