Израел рано утринава изврши стотици воздушни напади врз Газа, додека палестинските милитантни групи истрелаа ракети кон Тел Авив и Бершева.
„Престанете да пукате веднаш. Ескалираме кон целосна војна. Лидерите на сите страни треба да преземат одговорност за деескалација“, порача на Twitter пратеникот на ООН за Блискиот Исток, Тор Венесленд.
„Цаната на војната во Газа е поразителна и ја плаќаат обичните луѓе. ООН работи со сите страни за да се врати мирот. Запрете го насилството веднаш“, напиша Венесленд.
Прогласена е вонредна состојба во израелскиот град Лод, недалеку од Тел Авив, пренесува BBC.
Сирените за воздушен напад се огласија во Тел Авив рано утрово, изјави сведок на Reuters.
Избувнаа неколку експлозии, само неколку минути откако Хамас објави дека истрелал повеќе од сто ракети кон Тел Авив, како одговор на израелските воздушни напади врз палестинската крајбрежна енклава.
Израелскиот премиер Бенјамин Нетанјаху во вторникот вечерта рече дека нападите врз Газа ќе се интензивираат, а од понеделник ќе бидат насочени околу 500 позиции на Хамас и исламски џихад.
„Оваа операција ќе потрае, но ние ќе им ја вратиме безбедноста на граѓаните на Израел“, вети Нетанјаху.
Портпаролот на Хамас, Фаузи Бархум изјави дека Хамас нема да се повлече и ќе возврати на секој израелски напад.
Расте бројот на цивилни жртви
Министерството за здравство на Газа вчера соопшти дека 32 Палестинци биле убиени, но радиостаница поврзана со Хамас подоцна соопшти дека израелскиот воздушен напад врз стан над ресторан убил уште три лица, вклучувајќи жена и дете.
Израелската служба за итни случаи Маген Давид Адом објави дека 50-годишна жена е убиена во ракетен напад врз зграда во Ришон Лезион во близина на Тел Авив, и дека уште две жени се убиени во ракетниот напад на Ашкелон. Две лица загинаа во градот Лоѓ, откако ракета погоди возило. Израелските медиуми пишуваат дека меѓу жртвите има и седумгодишно девојче.
Насилството започна во понеделникот кога палестинските милитанти го ракетираа Ерусалим, а израелскиот премиер Бенјамин Нетанјаху предупреди дека милитантите ќе платат „многу тешка“ цена за тоа.
Палестинските милитантни групи во заедничкото соопштение велат дека биле истрелани ракети кон Израел во знак на протест против судирите меѓу палестинските верници и израелската полиција во џамијата Ал-Акса во источен Ерусалим.
Воената ескалација меѓу Хамас и Израел се зголеми вчеравечер, кога исламистичкото движење Хамас ја поплави израелската метропола Тел Авив со дожд од ракети, а израелската армија возврати со воздушни напади на Појасот Газа.
Меѓународната заедница повика на мир, а муслиманските земји изразија негодување за најсилниот пораст на насилството во последните неколку години помеѓу исламистичкото движење на власт во појасот Газа и еврејската држава поттикнати од конфликти во источен Ерусалим.
Запалена синагога
Синагогата во близина на израелскиот аеродром Бен Гурион беше запалена во вторникот, поради судири меѓу арапски и еврејски жители, јавија локалните медиуми.
Арапските жители наводно сквернавеле синагога во градот Лод, на 15 километри југоисточно од Тел Авив и ја запалиле. Запалени се десетици автомобили и искршени се излози на продавници.
Градоначалникот на Лода, Јаир Ревиво зборуваше за „граѓанската војна“ и повика на воведување на полициски час веднаш. Сериозни конфронтации имало и во Акра во северен Израел и во Јафа кај Тел Авив.
Состанок на Советот за безбедност на ООН
Советот за безбедност на ООН во среда ќе одржи вонреден состанок во врска со израелско-палестинскиот конфликт.
Состанокот беше инициран од Кина, Тунис, Норвешка, Франција, Естонија, Ирска, Свети Винцент и Гренадини, Нигер и Виетнам, откриваат дипломатите.
На претходниот состанок во понеделникот, Советот за безбедност на ООН не успеа да се договори за заедничка изјава.
