Восочна фигура со ликот на кралицата Елизабета Втора стана хит на интернет, откако се појави во црно такси пред болницата Lindo Wing, во која се породи Кејт Мидлтон.
Пред болницата имаше многу луѓе кои чекаа војвотката од Кембриџ и сопруга на британскиот принц Вилијам, Кејт Мидлтон, да се појави за прв пат во јавноста со своето ново бебе.
На прв поглед сите помислија дека станува збор за вистинската кралица Елизабета Втора, бидејќи восочната фигура е навистина убедливо направена.
„Восочна фигура од кралицата Елизабета Втора токму сега помина пред болницата во црно такси, што ја изненади и насмеа јавноста“, пишуваат британските медиуми.
Набргу после ова, се појавија бројни објави на социјалните мрежи, на кои главна тема беше восочната фигура со ликот на кралицата Елизабета.
За потсетување, Кејт беше сместена во приватниот дел од болницата познат и како Lindo Wing, каде веќе ги роди принцот Џорџ и принцезата Шарлот.
Од Кенсингтонската палата соопштија дека ќе го откријат името на новиот принц кога ќе биде „вистинското време за тоа“.
Јавноста тврди дека кралскиот пар ќе му го даде името Артур, а тоа име е фаворит и во обложувалниците.
Синот на Вилијам и Кејт се роди три недели пред свадбата на принцот Хари и поранешната актерка Меган Маркл.