Бизнис

Вредноста на Amazon падна за 45 милијарди долари

1. февруари 2019 - 11:39 | К.З.

И покрај рекордната заработка во последниот квартал од 2018 година, пазарната вредност на акциите на Amazon падна за огромни 45 милијарди долари. Вол Стрит беше разочаран од прогнозите за продажба на Amazon, кои резултираа во значителен пад на вредноста.

Акциите на најголемиот интернет трговец паднаа за 5,4% и покрај силните резултати на Божикниот пазар, кој им донесе профит од преку 3 милијарди долари во последниот квартал. Иако продажбата ги надмина очекувањата, акциите паднаа.

Од Amazon изјавија дека резултатите од продажбата нема да бидат толку позитивни во овој квартал, поради несигурноста околу новите закони за интернет продажба во Индија – голем маркет кој и понатаму е во фаза на раст. Новите регулации го примораа Amazon да повлече голем дел од производите дотогаш пласирани на пазарот во Индија, како Echo звучници, батерии, чистачи за под и слично.

Како дел од причините поради падот на вредноста е и загрижувачката изјава на Amazon за пораст на трошоците на компанијата, кои ќе се зголемат поради најмување на работници, изградба на складишта и други инвестиции.

Пред да падне вредноста на акциите на Amazon, извршниот директор на компанијата Џеф Безос беше прогласен за најбогат човек на светот и неговата вредност се проценуваше на околу 142 милијарди долари, скоро 50 милијарди повеќе од вториот најбогат човек на светот – Бил Гејтс.

Коментирај