Оваа недела е една од најлошите во историјата на авиопроизводителот Boeing. Причината за тоа е трагичната несреќа во Етиопија во која авион од оваа компанија се сруши и со себе понесе 157 човечки животи, и оттогаш акциите на Boeing на светската берза забрзано паѓаат, резултирајќи во огромни загуби.
Авион од типот Boeing 737 се сруши во Етиопија, а во несреќата загинаа 157 лица. Ова донесе лош публицитет за компанијата, која бележи историски големи загуби.
Денеска, по отворањето на Вол Стрит, акциите на Boeing паднаа за 3,2% на 387,10 долари, откако вчерашниот ден ѝ донесе на компанијата пад на акциите од 5%, пренесува Reuters. Тоа придонесе за вкупен пад на вредноста на компанијата од преку 20 милијарди долари.
Авионската несреќа во Етиопија ги натера аналитичарите да извршат ревизија на рејтингот на Boeing, а дури 7 од 24 аналитичари го променија рејтингот за компанијата во негативна насока. DZ Bank стана првата брокерска куќа која во последните две години ја промени препораката за акциите на Boeing и сега им препорачува на луѓето да ги продаваат нивните акции.
Во изминатите два дена Малезија, Сингапур, Германија и Австралија дадоа наредба за авионите на Boeing да бидат отстранети од нивниот воздушен простор, а последна во оваа низа е Велика Британија.
