На 9 јули 2006 година во финалето од Мундијалот во Германија се сретнаа Италија и Франција во натпревар кој ќе остане вечно запаметен по скандалозниот дуел на Зинедин Зидан и Марко Матераци.
Двата фудбалера буквално го одбележаа финалето. Во 7. минута Зидан донесе водство за Французите откако шутираше прецизно од белата точка. Виновник за пеналот беше токму Матераци кој го фаулираше Флоран Малуда.
Набрзо потоа, во 19. минута Андеа Пирло нафрли од корнер, а највисоко во францускиот шестнаесетник скокна Матераци и со глава ја затресе мрежата на Фабјан Фартез за 1:1.
Резултатот остана непроменет и по 90 минути игра, па се замина во продолженија. Во 110. минута се случи контроверзниот момент кој го оцрни финалето.
Главниот судија, Аргентинецот Орасио Елисондо не го виде инцидентот, а забележа дека нешто се случило откако Џиџи Буфон протестираше кај помошниот судија. Тогаш судијата го виде Матераци како лежи на зејмата. Бидејќи ниту Елисондо ниту неговите двајца помошници не видоа ништо, на сцена стапи четвртиот судија, Шпанецот Луис Медина Канталехо кој виде сѐ и му раскажа на судијата.
Зидан и Матераци се движеле еден крај друг, а Матераци со рацете го држел Зидан за дресот. Размениле зборови по што Зидан со главата во стил на бик го удрил Матераци во градите, кој паднал на земја. Елисондо му покажа директен црвен картон на Зидан.
Светскиот шампион се реши по изведувањето на пенали каде Италија триумфираше со 5:3 и по четврти пат ја освои титулата, а Франција за првпат загуби финале.
Инцидентот остана главна тема наредните денови, месеци, па и години.
Верзијата на англиските таблоиди
Три британски весници, The Daily Star, The Daily Mail и The Sun, објавија дека преку читачи од усни откриле како течел разговорот помеѓи Зидан и Матераци.
„Ако толку го сакаш дресот, ќе ти го дадам по натпреварот“, рекол Зидан.
„Не ми треба од син на ку*ва терорист“, возвратил Матераци. Таблоидите пишуваа дека Матераци го употребил зборот терорист алудирајќи на фактот што Зидан е етнички Алжирец и муслиман.
Зидан никогаш детално не го објасни инцидентот, а Матераци поднесе тужба до весниците кои веднаш го повлекоа напишаното.
Верзијата на Матераци
Италијанецот призна дека го навредувал Зидан, но категорично до ден денес отфрла секакво вреѓање на неговата мајка, која, патем, тој период била болна.
„Не зборував за неговата мајка. Ја загубив мајка ми на 15 години и сѐ уште сум емотивен кога зборувам за мајки“, изјави Матераци посочувајќи зошто не го направил тоа.
„Ако толку го сакаш дресот ќе ти го дадам по натпреварот“, рекол Зидан.
„Ја преферирам сестра ти ку*вата“, возвратил Матераци. Подоцна Матераци откри дека кога ги кажал тие зборови не ни знаел дали Зидан има сестра или не.
Помирување
ФИФА го казни Зидан со 3 натпревари пауза и 7.500 швајцарски франци. Сепак, бидејќи Зидан се пензионираше по Мундијалот, волонтерски одработи три дена општествена работа во име на ФИФА, како замена за суспензијата. Матераци отслужи 2 натпревара суспензија и плати 5.000 швајцарски франци.
„Провоцирањето е срашна работа. Јас никогаш не бев провокатор. Страшно е и најдобро е да се остане смирен. Сепак, ако ги погледнете моите 14 црвени картони кои ги добив во кариерата, ќе видите дека 12 од нив беа како резултат на провокации. Не се правдам, не барам изговор, но мојата страст, мојот темперамент и крв ме тераа да реагирам“, изјави Зидан во 2010.
Години подоцна, двајцата се сретнале на паркинг во Милано. Се поздравиле и размениле по некој збор, меѓутоа официјално никогаш не се смирија, а Матераци напиша и книга за инцидентот од чија продажба финансиските средства ги донираше во добротворни цели.
