Пред точно 10 години стартуваше првото ФИФА Светско првенство на африканскиот континент со натпреварот на домаќинот Јужна Африка и Мексико.
Сонот на Африканците стана јаве тоа јунско пладне кога на преполниот „Сокер Сити“ стадион во Јохансбург, пригушен од звукот на стотиците вувузели и под будното око на узбекистанскиот судија Равшан Ирматов, популарните „Бафана Бафана“ трганаа во налет кон мексиканскиот гол.
Публиката од 84 и пол илјади гледачи еруптираше во 55. минута кога Кагишо Дихашуа од средината на теренот го проигра во фор брзоногиот Сипиуе Чабалала, кој откако не ѝ даде шанса на мексиканската одбрана да го стигне, со топовски удар го разби голот на Оскар Перес. Голот го прославија со африкански танц покрај аут линијата.
Во 79. минута Рафаел Маркес израмни на 1:1 на разочарување на домашната публика, не оставајќи Африканците да се израдуваат на победа во првиот мундијалски натпревар на домашно тло.
На овој натпревар рекорд постави и бразилскиот тренер Карлус Алберту Парејра кој како селектор на домаќините се појави на шесто Светско првенство. Претходно ги водеше Кувајт во 1982, ОАЕ 1990, Бразил 1994 и 2006, како и Саудиска Арабија во 1998.
Јужна Африка ова реми подоцна го плати со елиминација. Следуваше пораз од силниот Уругвај со 3:0, а во последното коло со пирова победа од 2:1 над Франција стана првата земја домаќин која не успеала да ја мине првата фаза. За утеха им беше големата победа над великанот Франција со Рибери, Анри, Љорис, Галас, Сања, Сисе, Малуда, која доживеа дебакл пакувајќи се за дома без ниту една победа.
