Денешениот ден мината 2021 година засекогаш ќе остане запишан со златни букви во македонската фудбалска историја бидејќи на тој 13 јуни македонската репрезентација дебитираше на едно Европското првенство, а беше постигнат и првиот историски гол.
Тоа врнежливо јунско пладне во романската престолнина Букурешт беше огненото крштевање за македоснкиот фудбал на едно големо натпреварување. ЕУРО 2020, кое поради пандемијата со коронавирусот беше поместено за цела една година, конечно започна, со што почна и македонската авантура.
На стационот „Арена Национала“ во Букурешт македонските фудбалери пред стотици македонски навивачи истрчаа на тревникот на кој за противник ја имаа незгодната Австрија, која ни беше противник и во квалификациите, во кои двапати нѐ победи (1:4 во Скопје, 1:2 во Виена).
Тогашниот селектор Игор Ангеловски историскиот натпревар го почна со Столе Димитриевски, Стефан Ристовски, Дарко Велковски, Висар Муслиу, Бобан Николов, Енис Барди, Аријан Адеми, Елиф Елмас, Езџан Алиоски, Горан Пандев (к) и Александар Трајковски.
На разочарување на многубројните македонски навивачи, поведе Австрија во 18. минута преку Штефан Лајнер кој му побегна на Алиоски и со мајсторија го совлада Димитриевски.
Се играше 28. минута кога еруптираше „Арена Национала“. При еден навидум безопасен македонски напад австриската одбрана лоше интервенираше, топката се врати накај голот каде Дејвид Алаба и голманот Даниел Бахман не се разбраа, а нивното недоразбирање го искористи искусниот Пандев кој лесно ја пласираше топката во празната мрежа за израмнување на 1:1.
Австријците постигнаа уште два гола кон крајот на натпреварот и ја однесоа победата. Михаел Грегорич во 78. и Марко Арнаутовиќ во 89. минута беа стрелци на головите.
Во игра за Македонија од клупата за резерви влегоа Егзон Бејтулаи, Тихомир Костадинов, Иван Тричковски и Милан Ристовски.
И покрај поразот, овој натпревар и овој ден остануваат да будат убави сеќавања кај секој искрен и горн македонски фудбалски љубител.