Шпанија втор ден по ред регистрираше дневно зголемување на бројот на смртни случаи од новиот коронавирус по еднонеделно опаѓање, покажаа статистичките податоци што денеска ги објави шпанското Министерство за здравство.
Статистиката покажува дека 757 луѓе починале во изминатите 24 часа, што е зголемување од вчерашната регистрирана бројка – 743. Сепак, ова е зголемување од само 5,5% во однос на вкупниот број на починати пациенти со COVID-19.
Според Министерството за здравство, вкупно 14.555 луѓе починале досега од новиот коронавирус во Шпанија.
Бројот на активни случаи исто така се зголеми од 83.504 на 84.111, што е зголемување од 610 пациенти, но сепак најмало зголемување во речиси еден месец.
Министерството исто така пријави 48.021 оздравен пациент, што е за 4.813 повеќе во споредба со вчера.
Шпанските власти не го пријавија точниот број на пациенти со COVID-19 на интензивна нега, што се случува првпат откако почнаа да соопштуваат статистички податоци. Од Министерството велат дека тоа се должи на фактот дека сакаат да објавуваат збирни податоци за овие пациенти од сите 17 региони на Шпанија, но пет региони почнале да пријавуваат само актуелни случаи на пациенти на интензивна нега, а не вкупни. Додаваат дека ќе објават вакви податоци кога сите региони ќе почнат да ги пријавуваат случаите на ист начин.
