По синоќешното гласање за импичмент на американскиот претседател Доналд Трамп во Претставничкиот дом на САД, спикерката на Претставничкиот дом, Ненси Пелоси, повтори дека претседателот е отповикан затоа што поттикнуваше на бунт и оцени дека тоа претставува „актуелна закана за нацијата“.
Пелоси потоа пред новинарите ја потпиша одлуката на Долниот дом на Конгресот за отповикување на претседателот Трамп, што ќе биде испратена до Сенатот за натамошно постапување.
Откако ја потпиша одлуката Пелоси без збор или дополнителен коментар ја напушти салата за прес-конференции.
Вкупно 232 конгресмени во Претставничкиот дом гласаа „за“ повлекување, наспроти 197, додека четворица не гласаа, потврди CNN.
Вкупно седум пратеници во Долниот дом на Конгресот немаат право на глас.
Ова не е првпат Трамп да се најде пред импичмент. Слична ситуација имаше во ноември, 2019, со таа разлика што сега се одбројува една недела до завршување на неговиот стандарден претседателски мандат.
Лидерот на републиканското мнозинство во Сенатот, сенаторот Мич Меконел, го отфрли барањето на демократите во петок на вонредна седница на Горниот дом на Конгресот, да се потврди импичментот на американскиот претседател Доналд Трамп изгласан од на мнозинството во Претставничкиот дом.
Во соопштението од канцеларијата на сенаторот Меконел се наведува дека лидерот на демократското малцинство во Сенатот, Зак Замер, денеска бил јасно информиран за оваа одлука.
Редовната седница на Сенатот е закажана за 19 јануари, што значи дека процесот на Сенатот за отповикување на Трамп нема да заврши пред првите денови од претседателскиот мандат на Џо Бајден, чија инаугурација е закажана за 20 јануари, пренесува CNN.
Информацијата дека нема да има вонредна седница на Сенатот дојде откако сенаторот Меконел во приватните разговори изразил уверување дека отповикувањето на претседателот ќе биде добар начин Трамп да се отстрани од Републиканската партија, што, пак, е знак дека дошло до драматични промени во односот меѓу Трамп и Меконел, поранешни блиски соработници.
