Повторно станува збор за Австралија. Пар кој живее во Бризбејн на подот од својата спална соба пронашол источна кафеава змија, која важи за втората најотровна во светот.
Успеале полека да излезат од собата, потоа повикале експерт и почекале да ја отстрани змијата.
Ловецот на змии Стујарт Лејлор, од една од професионалните служби кои се занимаваат со ловење на залутани животни, бил повикан во домот на овој пар да ја отстрани змијата.
„Добив повик од жена која ми рече дека имаат проблем со змија, која ја пронашле на подот од својата спална“, вели Стујарт.
Сепак, кога тој пристигнал во собата не успеал веднаш да ја пронајде змијата, бидејќи таа се преместила на креветот и влегла под ќебето.
„Ми беа потребни околу десетина минути да ја отстранам“, изјави ловецот, објаснувајќи дека змијата подоцна ја ослободил пуштајќи ја во близина на некој поток, каде може да пронајде доста храна.
Источната кафеава змија се смета за втора најотровна копнена змија на светот, а живее во Австралија, Нова Гвинеја и Индонезија. Веројатноста за смртност ако ве касне оваа змија изнесува 60%.