Претседателот на Србија, Александар Вучиќ изјави дека Србија нема намера да нападне некого, ниту ја доживува Хрватска како непријател, но дека ќе продолжи да се вооружува за да спречи каква било можна агресија.
Вучиќ ова го изјави за ТВ Пинк, одговарајќи на прашање да ја коментира изјавата на хрватскиот министер за одбрана Иван Анушиќ, кој изјави дека Србија е опасна за Хрватска бидејќи произведува и купува екстремно големи количини оружје, бидејќи, според него, „никој не се наоружува без причина“.
„Ја почитуваме Хрватска, има исклучително силна армија. Сепак, во согласност со промената на доктрината на нашата армија, српската армија мора да биде посилна од значаен дел од нашите соседи заедно“, рече Вучиќ.
Тој додаде дека Србија ќе продолжи да се вооружува за да не се повторат ситуациите од 1995 или 1999 година.
„Нема да нападнеме никого, но не сакаме никому повторно да му падне на памет да изврши агресија врз нашата земја“, рече Вучиќ.
Коментирајќи ја изјавата на Анушиќ дека Србите се „полугладни“, Вучиќ рече дека Србија расте побрзо од Хрватска и додаде дека Хрватите „биле пред нас со децении“.
Осврнувајќи се на ескалацијата на конфликтот меѓу Украина и Русија, Вучиќ оцени дека ситуацијата оди во лоша насока и дека се повеќе излегува од контрола.
„Секоја изјава, од која било страна, не е деескалаторна и се плашам дека ќе доведе до уште поголем конфликт, проблеми и она што сакавме да го избегнеме – конфликт од пошироки размери“, изјави Вучиќ за ТВ Пинк.
Тој посочи дека Србија мора да ја зајакне својата армија и да се подготви за можните предизвици.
Зборувајќи за засолништата во Србија кои треба да издржат нуклеарни и атомски напади, Вучиќ рече дека сегашните извештаи се поразителни и дека ќе треба интензивно да се работи на тоа поле.
„Со години не се инвестираше во овие засолништа бидејќи никој не помисли на оваа ситуација“, рече Вучиќ.
„Тоа е системска грешка која мора да ја исправиме“, заклучи српскиот претседател.
