Српскиот претседател Александар Вучиќ изјави во Брисел дека потпишувањето на меморандум меѓу Албанија, Косово и Хрватска за соработка во областа на одбраната претставува прекршување на субрегионалниот договор и додаде дека е речиси сигурен оти НАТО не бил информиран за тоа.
Вучиќ, одговарајќи на новинарско прашање по средбата со генералниот секретар на НАТО, Марк Руте, потврди дека тоа е една од темите на разговор што тој ги покренал.
„Ова е прекршување на таканаречениот субрегионален договор за контрола на вооружувањето од 1996 година, но од реакциите од Хрватска и некои други делови од регионот видовме дека тие не се многу заинтересирани за тоа. Речиси сум убеден дека НАТО не бил ниту информиран и дека не им било ни кажано кои договори се прекршени“, рече Вучиќ.
Тој додаде дека не мисли дека ниту Приштина, ниту Загреб, ниту Тирана ќе бидат загрижени за ова.
„Наше е, згора на тоа, да му укажеме на г-дин Руте и на луѓето во НАТО и на сите други дека ова е прекршување на она што е прифатено, потпишано и почитувано од 1996 година. Наше е да ја разбереме реалноста и соодветно да се подготвиме за иднината“, продолжи тој.
Хрватска, Албанија и Косово потпишаа Декларација за зајакнување на одбранбената соработка, додека Србија најавува дека ќе бара итно објаснување од министерствата за надворешни работи на Хрватска и Албанија во врска со потпишаниот документ.
Декларацијата, за која се вели дека придонесува за безбедноста на Југоисточна Европа, вчера во Тирана, главниот град на Албанија, ја потпишаа министрите за одбрана на трите земји: Иван Анушиќ, Пир Венгу и Ејуп Маќедончи.
„Тие отворија трка во вооружување во нашиот регион, тоа е тешка ситуација за нас, но ја разбравме нивната порака. И ние ќе ја зачуваме нашата земја, ќе ги одвраќаме и секогаш успешно ќе ги браниме од секој потенцијален агресор, дури и од таков моќен“, рече Вучиќ.
Вучиќ тврди дека со Руте разговарал за сите важни прашања, соработката, ситуацијата на Косово и односите меѓу војската на Србија и КФОР, како и ситуацијата во Босна и Херцеговина. Тој оцени дека денеска е „успешен ден за Србија“.
