Властите во Вухан, епицентарот на пандемијата со коронавирус, официјално забрани јадење диви животни, беше соопштено денеска.
Локалната администрација на кинескиот град денеска соопшти дека покрај забраната, Вухан ќе стане „резерват за диви животни“, односно ќе биде забрането ловење на диви животни, со исклучок за „научни истражувања, регулирање на популацијата на одредени видови, следење на епидемиолошки болести и други специјални околности“.
Исто така се забранува одгледување на диви животни за храна. Властите ќе им понудат парична помош на фармерите кои досега се занимавале со одгледување на диви животни за храна.
Вухан, град од 11 милиони жители во провинцијата Хубеј, ги регистрираше првите случаи на COVID-19 лани во декември.
Потеклото на болеста уште се истражува, но најчеста претпоставка е дека заразата почнала од отворен пазар за месо од диви животни во овој град што беше затворен во јануари.
Според најновите податоци, во светот со новиот коронавирус досега се заразиле 5.035.976 лица. Од нив починале 326.238, а оздравеле 1.988.557 луѓе.