Властите на шпанскиот остров Ла Палма, на Канарските Острови, вчера воведоа карантин за околу 3.000 луѓе, поради страв од можни отровни гасови поврзани со истекување на нов поток лава од вулканот Кумбре Виеха.
Кризниот план за вулкани на Канарските Острови (PEVOLCA) „предвидува карантин“ за жителите на крајбрежните општини и села во близина на местото каде што лавата каскадира во морето во голем облак од бел чад, напишаа службите за итни случаи на островот на Twitter.
Карантин се воведува поради „можно испарување на штетни гасови“, се додава во соопштението.
Одлуката опфати „околу 3.000 луѓе“, додаде Мигел Анхел Моркуенде, технички директор на PEVOLCA, на прес-конференција.
Ова е третпат од почетокот на ерупцијата на Кумбре Виеха на 19 септември лава да истече во морето.
Покрај тоа, ова е првпат од почетокот на ерупцијата властите на островот да побараат од жителите на Санта Круз да носат маска FFP2 за да се заштитат од испарување на сулфур диоксид.
Експертите не го гледаат крајот на ерупцијата, која, според катастарските податоци, уништила речиси 1.500 згради, вклучувајќи речиси 1.100 куќи.
Според последните податоци добиени од европскиот систем Коперник, лавата зафатила 1.065 хектари земја.
