Производителот на локомотиви Wabtec, во соработка со Универзитетот Карнеги Мелон, ја претстави првата електрична локомотива со батерии во светот.
Компанијата од Питсбург, Пенсилванија тврди дека новата локомотива е „драматично помоќна“ од електричниот автомобил на Tesla и може да помогне значително да се намалат емисиите на јаглерод во веќе релативно „зелениот“ сектор за железнички транспорт.
Електричниот погон на батерија може да се спари со традиционален дизел мотор за да се намали потрошувачката на гориво за повеќе од 11%, што доведува до намалување на емисиите на јаглерод за 11%. Ова одговара на помала потрошувачка од речиси 24.000 литри гориво и 70 тони помала емисија на јаглерод.
Локомотивата, наречена FLXdrive, успешно ги помина тестовите во Калифорнија на почетокот од годинава и ја мина трасата долга 20.920 километри помеѓу Барстоу и Стоктон во период од три месеци. Локомотивата тешка 194.044 килограми користи 18.000 литиум-јонски батерии за да развие до 4.400 КС. Капацитетот на енергија е 2,4 mWh, а батеријата може да се наполни со регенеративно сопирање.
FLXdrive користи систем за контрола на патувањето со систем за вештачка интелигенција наречен Trip Optimizer за оптимизирање на енергетската ефикасност. Wabtec веќе развива електрична локомотива од втора генерација со батерија со енергетски капацитет од 7 mWh, што ќе ја намали потрошувачката на гориво и емисијата на јаглерод до 30%. Таа локомотива ќе има моќност еднаква на 100 автомобили на Tesla.
Австралиската компанија Roy Hill ги купи првите Wabtec комерцијално достапни FLXdrive возови, а верзијата од втората генерација ќе биде достапна во 2023 година. Оваа компанија се занимава со рударство.