Илон Маск ќе отпушти 75 отсто од вработените во Twitter доколку ја преземе социјалната мрежа, објави синоќа Washington Post.
Еден од најбогатите луѓе во светот ќе отпушти повеќе од 5.000 луѓе и има намера да ги остави само оние најпотребните за нормално функционирање на мрежата, тврди американскиот медиум.
Аналитичарите, експертите, па дури и вработените во Twitter го предупредија Маск дека таквиот потег ќе го уназади Twitter со години и ќе ја загрози неговата стабилност.
Драстичните отпуштања би го направиле Twitter поранлив на разни хакерски напади, спам пораки и други проблеми со кои нема да има доволно луѓе да се справат.
Во април, Маск сакаше да го купи Twitter за 44 милијарди долари, за нагло да се повлече од бизнисот бидејќи сметаше дека Twitter не му објаснил правилно колку кориснички профили всушност се „ботови“.
Twitter го тужеше, а судот во Делавер на странките им даде рок до 28 октомври да се спогодат. Во спротивно, тие се соочуваат со судење во ноември.