Поминаа неколку години од објавувањето на мегапопуларната видеоигра The Witcher 3: Wild Hunt, а се чини дека базата на играчи кои имаат само пофални зборови за играта не престанува да расте.
Затоа, студиото CD Project Red наскоро ќе го претстави изданието на оваа игра за следната генерација конзоли.
Со рестриктивните мерки поради коронавирусот ширум светот, се отвори можност за љубителите на жанрот RPG пак да тргнат со Гералт и дружината во десетина часови авантура, а со новото издание, наменето за новата генерација конзоли, Playstation 5 и Xbox Series X / S, сега истото ќе можат да го сторат и фановите на PC. Ова next-gen издание беше најавено минатата година, а сега стигна официјална информација дека можеме да го очекуваме во втората половина на оваа година.
Познато е дека играта ќе донесе 4K резолуција и перформанси од 60 слики во секунда, како и подобрена графика и голем број додатоци што ќе го направат гејмерското искуство попријатно. Според претходните најави, оваа надградба ќе биде бесплатна за секој што веќе е сопственик на The Witcher 3: Wild Hunt, па сега можеби е одлично време да го купат и оние кои сѐ уште го немаат.