Ова свинско филе подготвено со смокви и глазура од балсамико е одлична опција за раскошен ручек, како ресторански специјалитет.
Балсамико оцетот е многу богат со антиоксиданси, корисен е за кардиоваскуларниот систем и може да замени бројни преливи.
Потребни состојки:
за месото:
- 450 гр свинско филе
- 1 лажичка сува мајчина душица
- сол
- бибер
- 2 лажици масло
за смоквите и глазурата:
- 8 мали смокви исечени на половина
- 180 мл балсамико оцет
- 3 лажици путер
- 2 ловорови листа
- 1 лажичка свежа сечкана мајчина душица
- ¼ лажичка шеќер
Подготовка:
Ставете ја решетката во рерната во средина и загрејте ја рерната на 220 степени. Во мал сад измешајте ја мајчината душица, 1 лажичка сол и половина лажичка бибер. Намачкајте ја смесата од зачините врз месото. Загрејте го маслото во тава на силен оган. Додадете го месото и пржете од секоја страна околу 4 до 6 минути.
Префрлете ја тавата во рерна и печете го свинското месо околу 15 до 18 минути. Месото префрлете го на даска за сечење и покријте го со алуминиумска фолија. Потоа подгответе ги смоквите и глазурата од балсамико. Во истата тава на силен оган растопете 1 лажица путер. Додадете ги смоквите исечени странично надолу и пржете до златно кафена боја, околу 2 минути. Префрлете ги на даска за сечење со одсечената страна нагоре и ставете ги под алуминиумската фолија заедно со свинското месо.
Намалете ја топлината. Додадете балсамико оцет, ловоров лист, свежа мајчина душица и шеќер. Нека се крчка додека глазурата не се згусне и само го покрие дното на тавата, околу 7 до 10 минути. Тргнете ја тавата од оган. Отстранете го ловоровиот лист. Додадете ги преостанатите 2 лажици путер и нежно изматете го сосот. Зачинете по вкус со сол и бибер.
Исечете го свинското месо на парчиња, префрлете го во чинија за сервирање, наросете го со малку глазура и украсете со свежа мајчина душица. Послужете со смоквите и останатата глазура.
Ви предлагаме да гарнирате со пекарски компир и зелена салата.
