Со цел да се обезбеди ефективна помош на техничките тимови од земјата и регионот, како и на сите волонтери кои во текот на изминатите 4 дена беа во истоштувачка борба со бурните пламени кои го опфаќаа реонот кај селото Будинарци - беровско, Виталиа донираше енергетски барови од својот асортиман со висока нутритивна вредност кои, пред сè, ќе им овозможат одржување на високо ниво на енергија и физичка подготвеност на тимовите во овие исклучително тешки услови, но и се практични за консумирање и складирање при активни и мобилни операции.
Компанијата исто така донираше и опрема за волонтерите и жителите од Будинарци, Мачево и околните населени места кои во следниот период ќе организираат чистење на реонот од настанатата штета, како и враќање на изобилното природно богатство на малешевскиот предел.
„Во вакво неизвесно време на економска и здравствена криза, кога низ целиот свет се увидуваат последиците од климатските промени и покачените температури, важно е да покажеме и практикуваме хуманост во секоја сфера врз која можеме да дејствуваме. Би сакале да им искажеме огромна благодарност на сите кои учествуваа во стишување на шумските пламени во Будинарци, како и оние што активно се борат со пожарите низ целата територија на државата. “ – изјавија од Виталиа.
Од Виталиа посочуваат дека дојдено е критично време во кое компаниите мора да се тие кои ќе служат како главен мотиватор и двигател кон постигнување на посветла, позелена иднина и поради тоа, редовно ги следат и поддржуваат сите активности со хумана мисија.
Залагајќи се да се помогне во секоја област каде што е потребно, тие веруваат дека со оваа стратегија ќе ги инспирираат компаниите, како и индивидуалците, да се вклучат во континуираната борба за подобро утро.
