Атина, 12 мај 2021 (МИА) – Со укинувањето на забраната за движење меѓу региони, од петок, во Грција се воведуваат правила за внатрешните патувањата со брод или авион кон островите, односно грчката верзија на „Green Pass“ ќе биде задолжителна за сите патници, јави дописничката на МИА од Атина.
Заменик – министерот под премиерот задолжен за координација на работата на Владата Акис Скерцос попладнево ги соопшти дека новите правила кои пред сè, се однесуваат на грчките државјани, со оглед на тоа дека за туристите и онака „Green Pass“ ќе биде задолжителен за влез во земјата.
За патувања на островите, во пракса значи дека потребно ќе биде да се покаже или сертификат за вакцинација (да се поминати две седмици од втората доза), или негативен тест (направен 72 часа претходно доколку е ПЦР или 24 пред патувањето ако е селф тест/рапид тест) или потврда за прележан Ковид-19 (два месеци по заразувањето и до најмногу девет месеци).
Авионските и морските компании задолжително ќе вршат контроли, дали патниците имаат некоја од горенаведените потврди, кои важат и за грчките и за странските државјани со наполнети пет години.
За патувањата на Грците со автомобил, во континенталниот дел на Грција, тестовите не се задолжителни, но постои силна препорака за спроведување пред патувањето.
Од петок, во Грција се укинуваат голем дел од рестрикциите воведени на 7 ноември 2020 година, односно задолжителното испраќање смс пораки за секое движење на граѓаните и забраната за патување меѓу региони, полицискиот час дополнително се скратува, а се воведуваат правила за внатрешните патувањата со брод или авион кон островите, јави дописничката на МИА од Атина.
Заменик – министерот под премиерот задолжен за координација на работата на Владата Акис Скерцос попладнево, на прес конференција соопшти олабавување на мерките, а Грците, по над шест месеци карантин, од 14 мај Грците ќе имаат поголема слобода на движење, без да мора да испрааќаат смс пораки, без разлика дали е за пазарување, физичка активност, посета на лекар или за шопинг.
Полицискиот час, наместо од 23 часот, ќе почнува половина час по полноќ, додека пак до крајот на месецов угостителските објекти и понатаму ќе работат без музика.
Скерцос соопшти дека туризмот ќе се отвори со помош на „Green Pass“ односно потврда за вакцинација, за негативен тест или за прележан Ковид-19, а и понатаму ќе се користи и PLF формуларот ( Passenger Locator Form), при секое пристигнување во Грција.
-Безбедниот прием, престој и враќање на посетителите на нашата земја се основните принципи на нашиот план за отворањето туризмот, рече Скерцас.
Заедно со туризмот, на 14 мај се отвораат и музеите, една седмица подоцна ќе почнат со работа и летните кина, на 28 мај дозволено е организирање претстави и концерти на отворено, а во текот на следниот месец ќе се укинат рестрикциите за свадби и крштенки, кои ќе може да се одржуваат само на отворено со најмногу 100 гости.
Министерот за здравство на Грција Василис Кикиљас, на прес конференцијата соопшти дека денеска биле спроведени над 106.000 вакцинации, до крајот на денот ќе достигнат до четири милиони вакцинации од почетокот на процесот на имунизација, 2,6 милиони граѓани примиле по една доза, односно 24,59 отсто од населението, а над 1,3 милини се целосно вакцинирани , односно над 13 проценти од популацијата.
Во изминатите 24 часа во Грција се регистрирани 2.489 нови случаи на Ковид-19, починаа 70 лица, а 707 пациенти се приклучени на апарати на Одделите за интензивна нега.
Од почетокот на пандемијата во земјата има 369.554 потврдени случаи, а од COVID-19 починаа вкупно 11.211 лица.