Неколку минути качување по скали во кратки интервали во текот на денот може да го подобри вашето кардиоваскуларно здравје, стои во најновото истражување на кинезиолозите на Универзитетот Мекмастер и UBC Okanagan.
Резултатите објавени во списанието Applied Physiology, Nutrition and Metabolism укажуваат дека речиси секој може да си ја подобри кондицијата, каде било и кога било.
„Во резултатите јасно се препорачува секој од нас во својата секојдневна рутина да вметне и одење по скали. Ако живеете во зграда или работите во деловна зграда, искористете ги скалите уште рано наутро, тоа е навистина ефикасен тренинг“, вели Мартин Гибала, професот по кинезиологија на Мекмастер и главен истражувач во студијата.
Претходни истражувања покажале дека вежбите со низок интензитет или спринт трчање се многу корисни ако се изведуваат како една десетминутна сесија со неколку минути одмор меѓу серии, а качувањето по скали спаѓа во низата интензивни вежби што може да го подобрат здравјето на срцето, објави The Record.
Една група млади мажи енергично се качувале по скали три пати дневно, со еден до четири часа пауза меѓу сесиите.
Се качувале по скали три пати во неделата, во текот на шест недели. Истражувачите ги споредиле промените во нивната способност за извршување задачи со контролна група што не учествувала во испитувањето.
„Знаеме дека спринт трчањето во интервали функционира, но бевме изненадени кога видовме дека и качувањето по скали е подеднакво ефикасно“, вели Џонатан Литл, коавтор на истражувањето.