САД забранија внесување на електронски уреди во авионите за патниците кои доаѓаат од осум земји, главно од Блискиот Исток и северноафриканските земји.
Извор од американската влада за BBC рече дека оваа мерка се однесува на девет авиокомпании кои летаат од 10 аеродроми надвор од САД.
Американските медиуми објавуваат дека наредбата е резултат на информации што ги собрале разузнавачките служби.
На патниците им се забранува во авионите да внесуваат електронски уреди како лаптопи, таблет компјутери, камери, DVD плеери и електронски игри, но не и мобилни телефони.
Во февруари минатата година, авион на компанијата „Daallo“ беше оштетен при експлозија што се случи непосредно по полетувањето од Могадишу, главниот град на Сомалија.
Инспекторите рекоа дека од авионот испаднал човек кој носел лаптоп-бомба. Пилотот сепак успеа безбедно да го слета авионот, а бомбашот беше единствениот настрадан.
Ако авионот достигнел висина на летање, со сигурност ќе се распрснел.
Исламистичката милитантна група Ал Шабаб која е поврзана со Ал Каеда ја презеде одговорноста за овој напад, а американските разузнавачи сега се загрижени дека можни се нови напади.
Аеродромите засегнати со наредбата се: Queen Alia International (Јордан), Cairo International Airport (Египет), Ataturk Airport (Истанбул), King Abdulaziz International (Саудиска Арабија), King Khalid International (Саудиска Арабија), Kuwait International Airport (Кувајт), Mohammed V International (Мароко), Hamad International (Доха, Катар), Dubai International (ОАЕ) i Abu Dhabi International (ОАЕ).
Не е познато до кога ќе трае забраната.
