Каталонија денеска стана првата шпанска покраина која воведе задолжително носење заштитна маска за сите жители и посетители, на сите јавни места и во секакви услови.
Одлуката што ќе стапи на сила утре ја соопшти каталонскиот премиер Ким Тора, четири дена откако 200.000 луѓе во областа Сегрија беа ставени во карантин бидејќи таму изби ново жариште на COVID-19.
„Маските ќе бидат задолжителни во цела Каталонија, а не само во Сегрија. Сметам дека ова е многу важна мерка за заштита“, рече Тора и додаде дека властите ќе делат заштитна опрема.
Шпанските власти минатиот месец воведоа задолжително носење маска во затворени простории и на отворено каде не е можно да се одржува пропишаната дистанца од 1,5 метар, додека не биде најдена вакцина или лек за COVID-19.
