„Не треба да се формира експертска влада за излез од политичката криза во земјава, но не треба ниту да се одреди фиксен датум за избори“, смета лидерот на опозициската партија СДСМ, Зоран Заев.
Тој, на дебатата што ја организираше „Цивил“, а на која присуствуваа партии и движења, но не и претставници на ВМРО-ДПМНЕ, ДУИ и ДПА, иако биле поканети, рече дека избори на 5 јуни нема да има.
„Фиксниот датум се покажа како грешка и не треба да има фиксен датум за избори. Но истовремено ако не се стави датум, тоа ќе значи редовни избори во 2018 година. Но дали сме спремни уште две години на топло-ладно? Треба да има условен датум. Што тоа значи? Ако условно кажано се одреди условен датум за избори во октомври, а ако на пример, некој од роковите за реформи се пробие за две недели, ќе трева да се одложат и изборите за две недели“, рече Заев.
Партиите треба да го исполнат договорот од Пржино, смета Заев, а не да се формира експертска влада.
„За експертска влада е оставен простор, ама Никола Груевски нема да направи реформи и да оди во затвор. Никола Груевски и со експертска влада ќе има 52 мандати во Собранието, и што тогаш ќе постигне таа влада?“, праша Заев.
Лидерот на опозицијата откри дека нема преговори меѓу четирите политички партии во моментов, но дека има билатерални разговори на партиите со меѓународните претставници.
Заев вели дека собраниска седница може да се свика ако најмалку пет члена на ДИК поднесат писмо до претседателот на Собранието, Трајко Вељаноски, дека нема прочистен список и нема услови за фер избори.
„Потребно е да се промени Изборниот законик и да постои можност за увид на цел Избирачки список. Исто така, ДИК треба да има право да ги избрише оние 40.000 граѓани од Избирачкиот список кои немаа законско право да водат таму, како и 67.000 граѓани да ги стави во вториот дел од списокот, со ѕвездичка со што ќе се знае дека тие се повеќе од три месеци во странство, за да не бидат предмет на манипулација“, рече Заев.
Во однос на аболицијата од страна на претседателот Ѓорге Иванов, кој ги ослободи од одговорност политичарите и нивните помошници од делата кои се водеа или ќе се водат против нив од Специјалното јавно обвинителство, надлежно за случаи кои произлегуваат од незаконското прислушување разговори, Заев оцени може да се случи нејзино повлекување, да се повикаат на членови од Закон за управна постапка, или, пак, во Парламентот, со вметнување нов член.
„Аболицијата е правосилна за Никола Груевски. Аболицијата не е правосилна за Заев и за Верушевски. Ние на време ја обжаливме и таа е пред Апелацискиот суд и пред Судот во Стразбур“ рече Заев.
