Во интервју за Deutsche Welle лидерот на СДСМ, Зоран Заев одговори на новинарско прашање дали Никола Груевски директно или индиректно барал гаранции за негова и за амнестија на одредени лица од неговото најблиско партиско и семејно окружување.
„Да, Груевски ова што го прави, го прави за да се пазари за амнестија. Амнестија нема да има. По сѐ што слушна јавноста што сѐ Груевски правел – ќе оди на суд. Ќе има независен судски систем, судот ќе ја цени неговата вина. Но бегање од соочување со правдата – нема. Ветив на граѓаните, Македонија ќе биде правна држава и правдата ќе важи подеднакво за сите“, гласи одговорот на Заев.
Понатаму, во интервјуто тој вели:
„Мора да има одговорност и за извршителите на насилното крваво сценарио во Парламентот, но и за нарачателите. По она барање за амнестија од организатори и мотиватори на протестите, но и по вчерашната реакција на ВМРО-ДПМНЕ со оправдување на насилствата, јасно е кои се нарачателите – Никола Груевски и раководството на ВМРО-ДПМНЕ, заедно со Иванов, Вељаноски, Чавков. Јасно е, станува збор за организирано насилство со лица од институции на системот и ова е уште еден доказ дека на Македонија итно ѝ се потребни промени. И промени ќе има. Секој кој сторил дела против граѓаните и државата, ќе мора да се соочи со правдата. Во соработка со стручната јавност и со граѓаните ќе обезбедиме професионален, праведен и независен правосуден систем, а ќе ги ослободиме и институциите да работат независно, во интерес на граѓаните. Да, тоа е процес, но одлучни сме да го обновиме државниот систем во којшто, како што гледаме, има остатоци од режимот во распаѓање.“