Загадениот воздух на кој се изложени многу граѓани во земјава, особено во есенските и зимските месеци, има опасни последици по човечкото здравје.
Меѓу нив е и намалувањето на витаминот Д во телото, кој е пресуден за одржување на целокупното здравје.
Витаминот Д е неопходен за организмот бидејќи ја помага апсорпцијата на калциум и фосфор од исхраната и на тој начин ги зајакнува коските и забите.
Ниското ниво на витамин Д се поврзува со слабеење на имунитетот што може да резултира со почеста појава на инфекции на респираторниот систем, но и хронични заболувања на срцето и крвните садови, појава на дијабетес, депресија и карциноми.
Ова се симптомите што ќе ви помогнат навреме да интервенирате во случај да имате недостиг на витамин Д:
Зголемено потење
Ако одеднаш почнете да се потите повеќе од вообичаено, без некоја посебна причина за тоа, како зголемена физичка активност, а температурата на телото стандардно ви е 37 степени Целзиусови, треба да го проверите нивото на витамин Д во организмот.
Исцрпеност и слабост
При недостиг на витамин Д во организмот ќе почувствувате слабост и исцрпеност, дури и кога сте доволно одморени и наспани, без разлика дали вежбате редовно или не. Истражувањата покажуваат дека внесувањето суплементи со витамин Д помага во контролирањето на подвижноста на мускулитре, а кај лицата постари од 60 години го намалува ризикот од паѓање и повреди за 20 отсто.
Хронична болка
Понекогаш ја занемаруваме болката што не е интензивна, иако свесно ни предизвикува непријатност или неудобност, како постојана болка во мускулите, зглобовите, коските. Тоа е знак дека ви недостига витамин Д во организмот. Ако болката не престане по неколку недели веднаш направете анализа на крвта.
Лошо расположение
Хроничниот недостиг на витамин Д може да предизвика депресија. Не е точно утврдено кој механизам го предизвикува тоа, но можно е витаминот Д да влијае на хормоните како серотонин кој влијае на расположението.
Храна богата со витамин Д: говедски и телешки црн дроб, жолчка од јајце, туна, сардина, шитаке печурки, млеко, јогурт, бадемово млеко, сок од портокал, тврди сирења, мешункаст зеленчук.
Суплементите со витамин Д секогаш земајте ги со храна. Витаминот Д е најдобро да го земете рано попладне бидејќи може да ви го попречи циклусот на спиење.