Легендата вели дека земјотрес за еден ден и една ноќ го потонал островот Атлантида во океанот, и тој засекогаш останал загубен во внатрешноста на земјата. Сепак, сега се појави уште една во низата на теории, која, наводно ја открива вистинската локација на загубениот град.
Загубениот град Атлантида со години наназад претставува една од најголемите мистерии. После бројните тврдења за митскиот остров, сега теоретичарите на заговор велат дека ја откриле точната локација, наведувајќи дека таа цело време била пред нас, пишува британскиот магазин „Mirror“.
За Атлантида прв зборуваше грчкиот филозоф Платон, чии книги датираат околу 360 години пред нашата ера. Според приказните, кои денеска станаа легенда, островот Атлантида потонал во океанот за еден ден и една ноќ, па е загубен засекогаш, бидејќи боговите ги казниле луѓето поради нивната ароганција.
Теоретичарите на заговорот долго време ја бараа локацијата на митскиот град, со претпоставки дека можеби станува збор за островите Санторини, Сицилија, Крит или Кипар.
Меѓутоа, на каналот „Bright Side“, на YouTube, се појави нова теорија, според која структурата Ришат во африканската пустина Сахара, наводно има голема сличност со познатите детали за Атлантида, кои се пишувани илјадници години наназад.
Структурата Ришат е уште позната и како „Окото на Сахара“, а се наоѓа во градот Оудане во западна Мауританија. Се сметаше дека овој бизарен, кружен облик, по кој и ова место го носи името, е создаден после удар на астероид, но не постојат доверливи докази кои докажуваат дека тоа е вистина.
Сепак, научниците сметаат дека структурата мора да биде природна појава. Меѓутоа и тоа не мора по секоја цена да биде така, ако можеме да веруваме во теоријата на порталот „Bright Side“.
Платон во своите текстови пишува дека Атлантида е уништена 11.600 година пред новата ера, што временски се совпаѓа со теоријата која се поврзува со структурата Ришат во Сахара, според која токму во тој период овде удрил астероид предизвикан од леденото доба.
Но, случајностите не завршуваат овде.
Како што пишува на „Bright Side“, структурата Ришат има надворешен пречник на кругот од 23,5 километри. Во записите на Платон, Атлантида имала 127 стадиуми, што денеска би изнесувало 23,49 километри.
Платон исто така во своите текстови ја опишува Атлантида со следните зборови: „Имаше алтернативни зони на морето и копното кои се оцртуваа во вид на круг, постоеја две земји и три води“.
Интересно е тоа што описот навистина е многу сличен со изгледот на структурата Ришат, кога таа се набљудува од сателит.